රාජසිංහ අංකල්

                                                                (AI Generated Image)
 

      80 දශකය මුල මසකට වරක් හෝ දෙවරක් පියාඹන්නාක් මෙන් අපේ ගෙදර යනෙන චරිතයක් විය. ඔහු මගේ පියාගේ මිතුරෙකි.ඒ මිතුරුකමේ ඇරඹුම මම නොදනිමි. රජයේ ලිපිකරුසේවයේ නියුතුව සිටි මගේ පියාත් DRO කෙනෙක් වශයෙන් සේවය කල රාජසිංහ අංකලුත් ජිවන ගමනෙහි යම් තැනක, රාජකාරි සන්ධිස්ථානයකදී හමුවී, එම සබඳතාව ගොඩනැගුනේ යැයි විශ්වාස කලහැක. මාහට දැනුම්තෙරුම් ඇතිකාලයෙහි පටන් රාජසිංහ අංකල් රැකියාවක් නොකළ නමුත් නිතරම පෙන්ෂන් එක ගැන උනන්දුවූ බැවින් ඔහු විශ්‍රාම වැටුපකට හිමිකම් කිවූ බව අනුමාන කල හැක.

   එතරම් උසක් නැති තලෙළු එහෙත් තරමක තරබාරු දේහයක් සහිත රාජසිංහ අන්කල්, බිත්තර ගෙඩියක හැඩති මුහුණකින්ද, වැලිකැට ඇතිරු මෙන්  සුදු කෙස් තැනින්තැන තවමත් පැළවෙන තට්ටයකින්ද, හැඩ විය. ඔහුගේ නැහැය බිඳුණු නැහැ පොල්ලකින්ද වක් වී අග පැතලි වූ සවාභාවයකින්ද නිසා  ගම්පෙරළියේ පියල් සතුවූ කජු පුහුලම් නහයට වඩාත් සමාන විය.

    80 දශකයේ අපේ ගෙවල් අමුත්තන්ගෙන් සරු වී තිබිණ. අපේ නිවසෙහි කාලයෙන් කාලයට ලොකු අම්මලාගේ දරුවන්ද මහප්පලාගේ දරුවන්ද අපි සමගම හැදී වැඩිණි. සමහරුන් අපේ නිවසේ සිට පාසල් ගිය අතර දඩබ්බර ගැටවර වියේ පසුවූ අය දෙමාපියන්ට වඩා පුංචි අම්මාට හෝ බාප්පාට හිත විවෘත කළහ.අපිද කාලෙන් කාලයට එවැනි ගෙවල්වල ගොස් මාස ගණන් ගතකරයි. අපේ අසල් වැසි නිවෙස් වලද ඕනෑ තරම් මෙවැනි නෑදෑ හිතමිත්‍රයන් දැකිය හැක. පිටපලත්වලින් රජයේ සේවයට පැමිණ  හෙදියන් ගුරුවරුන් ලිපිකරුවන් තැපැල් කරුවන් වන අපගේ අසල්වැසියන්ගේ, කිරිඅම්මලාද බාප්පලාද නැන්දලාද යාලුවන්ද අපිත් හඳුනාගත්තෙමු. මේ කිසිවෙකුත් මිලමුදලින් පොහොසත් නැත. ඒ ජිවිත වල තිබුනේ තියනදෙයක් කාබී වැටි නිදන්නට ඉඩක් ලැබ මැසිවිල්ලක් නැති සරල සන්තෝෂයකි.

   1920 පමණ දකුණේ ඉපිද යාපනයේ විද්‍යාලයකින් අධ්‍යාපනය ලැබ ඇති රාජසිංහ අංකල් ඉංග්‍රීසි දෙමල සිංහල භාෂා ත්‍රිත්වයම සුහුරුව හසුරවයි. කොළඹට නුදුරින් තම බිරිඳ සතුවූ විසල් නිවසක බින්න බැස සිටියද ඔහු එහි විසුවේ කලාතුරකිනි.අපේ නිවස සහ නෑදෑ නිවාස කීපයකුත් හැරුනුකොට ඔහුගේ චාරිකාවේ ප්‍රධාන නැවතුම්පොළ අනුරාධපුරයේ තිබු කුඹුරයි. ඇතැම්විට මාස ගණනක් අතුරුදහන් අංකල් සොයා කොළඹින් ඔහුගේ පුතා පැමිණෙයි. අපේ අය්යලා සමග සොයා බලු විට අංකල්  තිගැස්මකින් සංකාවකින් තොරව කුඹුරේ පැලක වෙසෙයි. කිසිදු දවසක වී බුසල් ගණනින් නොලැබුන මේ කුඹුරත් රාජසිංහ අංකලුත් තමන්ගේ හැකියාවන් උපරිමය  එළියට නොදීමට වගබලාගත්තේ, කතාකරගෙන එකඟතාවයකට පැමිණි ලෙසය. කෘමිනාශක පොහොර කුලීකරුවන් ආදී නොයෙක් ආකාර ගැටුම් ඇතිකරගත් රාජසිංහ අංකල්, මඩේ බැස හරි හරියට වැඩහි යෙදෙයි.

   ඔහුගේ ගැටුම් සහ කළහ,  කුඹුරත්, අයිතිව තිබු ඉඩම් කිහිපයත් සමග පමණක් නොව බස්රථයක කොන්දොස්තර කෙනෙකු සමග වුව විය හැක. ඔහුගේ නිවාස ඉදිරියෙන් උරුහම්බාන ගැටවරයෙකුට වරක් ඔහු කනට ගැසුවේය. මේ ශක්තිය ඔහුට ලැබුනේ උගත් පාසලෙන් වග ඔහු නිරන්තරයෙන් කියයි. පල්ලිය මගින් පාලනය වූ විද්‍යාලයේ නේවාසික සිසුවෙක් වූ ඔහු උදෑසන ආහාරයට ලබුන කෑම  පිගානක අවසානයට කෙස් ගසක් දමා පිගන් දෙකක් කෑ වග කියා උස හඩින් සිනාසෙයි. පාසලේ බොක්සිං ක්‍රීඩකයකු වූ ඔහු තමන්ගේ නහයෙහි හැඩය ප්‍රතිවාදියෙකුගේ පහරකින් බිඳී ගිය ආකාරය රග දක්වයි. මේ කිසිවකුත් අතිශෝක්තියක් නොවන බව අද පවා ඔහුගැන මතක පිටු පෙරලෙන මට විශ්වාසය.   

    අපේ නිවාස ඉදිරියෙන් ඇති පාර බොරළු දමා සකස්කළ එකකි. රාජසිංහ අංකල් වෙලාවක් කලාවක් නොමැතිව එයින් මතුවෙයි.ඔහු මතුවී එන්නේ පාරේ දුහුවිලි වලින්මදැයි සිතෙන තරමට ගුරු පාටත් ඔහුත් ඒකාත්මික වෙයි. එක උරහිසක එල්ලා ගත දිග පටි සහිත ගමන් මල්ලේ ඇදුම් කැබලි කිහිපයකි. අනෙක් අතේ ෆයිල් මිටියකි. ඒ මිටියටම මැදිවී ඈපා පංචාංග ලිත් පොතකුත් රැදෙයි.කලාතුරකින් රැදෙන ක්‍රීම්  ක්‍රැකර් පෙට්ටියක් හැරුන විට කිසිම කෑමක්  බිමක් හෝ රස කැවිල්ලක් ඔහු ඇත නොරැදෙන නිසා කුඩා මට ඔහුගේ පැමිණීම කිසි අරුමයක් හැඟීමක් නූපදයි.

    ඔහු අපේ නිවසේ කොට බිත්ති බැඳ තිබු ඉස්තෝප්පුවේ ඇති පුටුවකට බරදෙයි. මේ ගමන් වල හේතුව උසාවියේ විභාගවන ඉඩම් නඩු හබ වලට පෙනී සිටීමයි. ටික මොහොතකින් පුටුවෙහිම නිදා ගන්නා රාජසිංහ අංකල් අවේලාවේ පැමිණීමෙන් කුස්සියට කිසිදු බරක් නොදෙන්නට සැලකිල්ලක් දක්වයි.රෑබෝවුවිට ඉස්තොප්පුවෙහිම පැදුරක විසිර ඇලවෙන හෙතෙම ඔහුගේ ඇඟ යකඩින් සෑදුවක් මෙන් මදුරුවන්ටද රස්නයටද දහදියටද බාධාවක් වීමට ඉඩක් නොදෙයි. පසුදින අවදිවන ඔහු සපත්තු ටයි පටි වලින් සැරසී ඔහුගේ සදාකාලික ඉඩම් නඩුවට පිටත් වෙයි. හෙතෙම මිය ගිය පසුවත් ඉත්තේරුවෙන්ම කරන්නට යෙදුන එක් කාරණයක් නම් මේ නඩුව දවසට පෙනී හිඳ මියගිය වග පැවසීමයි. මේ ඔහුගේ ඉඩම් තණ්හාව නොව පටන් ගත් වැඩ අවසානයක් දක්වාම කරගෙන යාමට ඇති ආසාවයි.

    නඩු හබ වලට අමතරව ඔහු කේන්දර බැලීමටද රුසියෙකි. ඔහු නැකත් සාදාගත් බවක් නොදන්නා නමුත් පංචාංග ලිත ඇසුරු කරගෙන කේන්දර බලයි. මේ කේන්දර ලිවීමට මගේ සහෝදරයන්ද ඇතැම් විටක හවුල් කර්ගනියි. ඒ රාජසිංහ අන්කල්ගේ හැඩ ඉංග්‍රීසි අකුරු සමග සැසදීමේදී  සිංහල ලිවිම ඉතා නරක මට්ටමක තිබුන හෙයිනි. ඔහුගෙන් කේන්දර බලා ලංකාවේ දක්ෂ ප්‍රසිද්ධ ව්‍යාපාරිකයෙකු සෑම  ගෙදරකම සිටියයුතු වේද මහත්මයෙක් දක්වා  දියුණුවූ බවත් ඔහු හමුවීමට අන්කල් නිතර ගියවගත් අපි දැනසිටියෙමු. කළුවර වැටුන ඇතැම් දිනවල රුපවාහිනී නොතිබුන අපේ  නිවසෙහි නිවැසියන් එක කරගෙන විදුරුවක් මුනින් නමා භූතයන් සමග කතාකිරීමට උත්සහයක් ගත්තත් අපේ ගෙදරට භූතයන් එන්නට බයවිය.

                          

    දේශපාලනිකව රාජසිංහ අංකල් J.R. සහ තොන්ඩමන්ට බලු බැනුම් බනියි. ඔහු 1970 කාලයේ චන්දයක් ඉල්ලු බව අසා ඇති නමුත් ඒ කුමන චන්දයකටද කුමන පක්ෂයකින්ද නොදනී.ඔහු විවාහ පත්වුයේ තරමක් වයසට ගොස් බව ඔහුගේ මගුල් පින්තුරයෙන් පෙන්නුම් කරයි. රාජසිංහ ඇන්ටි රුපරාජිනි  තරඟයකින් දිනුමක් ලද රූමත් කාන්තාවකි. එහෙත් ඇයද ඉතා සරල දිවිපෙතක් ගත්කල අතර ආගමට දහමට බරවිය.

   දිනක් රාජසිංහ අංකල්  හදිසියේම හැන්දෑ වරුවක අපේ ගෙදරට ගොඩ විය. ඔහු පිටුපසින් අපේ නිවසට ගොඩ වන්නේ ඔහුගේ නව යොවුන් දූවරුන් තිදෙනාය. කොළඹ අශ්‍රිතව හැදුණු  ඔවුන් මා මුල්වරට දුටුවේ එදාය.එවකට මගේ වයස අවුරුදු අටක් පමණ වන්නට ඇත.ගැහැණු ළමුන් කලිසම් හැඳ සිටිනු ගෙදර තිබුන සඟරා තුලින් දැක තිබුන මට දැන් සජීවීව තොල් ආලේපන උලාගත් කලිසම් අදින ඉංග්‍රීසි උගත් අක්කලා තිදෙනෙක් ඇත. මෙසේ නෑදෑ හිතමිත්‍රයන් නොකියා පැමිණීම ඒ දිනවල අරුමයක් නොවුවත් නව යොවුන් දියණියන් තිදෙනෙක් අපේ අම්මාට තරමක බරකි. ඈ කුස්සියේ සිට මැසිවිලි නගමින් අමුත්තන්ට තේ ලැහැස්ති කරයි. ඒ අතරතුරම අමුත්තන්ගේ නවාතැන සඳහා ඉඩ ලබදිය යුතුය.වැඩිහිටියන්ගේ මේ කතාබහ මටද ඇසේ .විටක සාලයට එබිකම් පාමින්ද කුස්සියට දුවමින්ද මම අන්ද මන්ද චරිතය රඟපාමින් සිටියෙමි.

    මද වේලාවකින් මමද අක්කලා ද කුළුපග වීමු. කලිසම් හැඳ ඉංග්‍රීසි දැනසිටියත් ඔවුන් තුළ සිරවී සිටියේ අහිංසක ගැහැණු ළමුන් වග මට වැටහිනි . ඕනෑම පොඩි එකෙක් දකින විට cute කියන්නත් සිංදුවක් කියන්න කියන ඉල්ලීමත් මට යොමුවින. මුලින් ලැජ්ජාවෙන්ද  පසුව දඟකාර ලෙසින්ද මේ ප්‍රේක්ෂකාගාරයේ ඉල්ලීම් ඉටුකරමින් ඒ සවස් වරුවේ අන්ද මන්ද චරිතයේ සිට  ප්‍රධාන නළු චරිතයට රූපාන්තරණය වෙමින් සිටියෙමි.ඒ දිනවල මගේ එක්  විනෝදාංශයක් වුවේ මේසයක් මතට නැගී කතා පැවැත්වීමත්, නොඑසේනම් සිවුරක් ආකාරයකට රෙද්දක් පොරවාගෙන බණක් කිවීමත් ය. මගේ ප්‍රේක්ෂකයෝ මේ හැකියාවන් දැන සිටියහ. ඔවුන්ගේ දැඩි පෙරැත්තය මා මේසය මත ගොඩ කරයි. 

අත්පුඩි හඩින්  දිරිමත්වූ මම කතාව පටන් ගතිමි.

     "සභාවෙන් අවසරයි , අද  අපේ ගෙදර හොඳ දවසක්. කට්ටිය ගොඩක් ඉන්නවා.ලිප්ස්ටික් ගාගත්තු  කලිසම් ඇඳගත්තු කොළඹ අක්කලා  ටිකක් අපේ ගෙදර ඇවිත්.අපිට ඉඩකඩ ප්‍රශ්නයක් තියනවා . ඉන්න දෙන්න තැනක් නැහැ. ඒ අයගෙන් අපිට කරදරයි කියලා අපේ අම්මා ...."

මෙතක් මගේ කතාව සාඩම්බරයකින් අසා සිටි අපේ ගෙදර වැඩිහිටියෙක් වහාම ඉදිරිපත්වී කපාහැරීමේ බලධාරී තනතුරට ආරූඩ නොවන්නට අපේම ගෙදර සියලු වැඩිහිටයන්ගේ සායම යන්නේය. දැනටමත් ඇතිව තිබූ හානිය පුරණය සඳහා කව්රුන් ඉදිරිපත්වුවාදැයි මතක නැත. එහෙත් වරදක් දුටු තැන කෝටුවකින් තලන්නට පසුබට නොවන අපේ අම්මාගෙන් ගුටි නොකා බේරුනේ අමුත්තන් පිරිසක් ඉදිරියේ එසේ නොකරන පිළිවෙත මතය.

අපේ අමුත්තන් නම් මේ කථාව එතරම් හිත් අමනාපයකට ගත්තේ නැත. ඉතා පසු කලෙකත්, මගේ දරුවන්ටත්, ඔවුන් තවමත් මේ කතාව විස්තර කොට සිනාසෙයි.අපේ අම්මා කෙරෙහිත් අක්කලා තුළ ඇත්තේ අපමණ සෙනෙහසකි. ඒ ඇය විසින් ඔවුනට කරන ලද යම්යම් උපකාරයන් නිසාය.

අපේ අම්මා, තාත්තාගේ මිත්‍රයින්ගෙන් රාජසිංහ අංකල්ට විරුද්ධත්වයක් නොපෑමට ප්‍රධාන හේතුවක් නම් ඔහු මත්පැන් පාවිච්චි නොකිරීමය. 

ඔහුගේ දරුවන් කොතෙක් පෙරැත්ත කලත් රාජසිංහ අංකල් ගෙදරට වී සීටීමට  ප්‍රිය නොකළේය. අවසානය දක්වාම ඔහුගේ චාරිකාවත් කුඹුරත් අත්නොහැර සිටියේය.පසු කලක නිර්මාංශ ආහාරවෙලකට පුරුදුව සිටි ඔහු අවුරුදු 70 පසුවී අනුරාධපුරයේම අවසන් හුස්ම හෙළුවේ අවසන් මොහොත දක්වාම දීර්ග කාලීන බෙහෙතක් පාවිච්චියට නොගෙනමය.

මගේ ජිවිතයට හමුවූ මෙවැනි මිනිසුන් අපි ජීවිතය දකිනා කෝණයට වඩා හාත්පසින් වෙනස් ආකාරයට ජීවිතය දෙස බලන බව සිතනවිට විශ්මයක් නිහඬ මගේ සිතට දැනේ. ඔවුන් සිටින්නේ අපට ඉදිරියෙන්ද පසුපසින්ද නොඑසේනම් වෙනම තලයකදැයි කිසිවෙකුටත් විනිශ්චය කළනොහැකි බව පමණක් නිසැකවම කිව හැකිය.

අනාවැකිය 2

 

නාඩි බලන්න ගියපු විස්තරය පහුගිය ලිපියෙහි සටහන් කරා.අපේ නෝනා කව්රුහරි හමු උනහම නාඩි ගැන එයාගේ විස්තරය කියවනවා. ඒක ඉතින් ටිකක් තාරබර ඇරලා ගන්න ඕනේ වුනත්, අපේ හිතමිත්‍ර සමාගම  අතරෙහි මේක ප්‍රචලිතවෙලා. අතීතයේ නාඩි බලපු අයයි, අපේ නෝනගේ තොරණේ විස්තරය අහලා ගියපු අයයි, දැන් ගොඩක්  ඉන්නවා.

 90 ගණන් වල නාඩි බලපු කෙනෙකුට එයා විවාහ වෙන පුද්ගලගේ නම නීවෑරිදිවම කියලා තිබුනා ඒ වෙනකොට එහෙම මංගල යෝජනාවක්වත් ඇවිත් තිබිලා නැහැ. විවාහය ප්‍රමාද කෙනෙකුගේ විවාහ වෙන වයස දරුපල හරියටම කියලා තිබුනා

වර්තමානයේ ඉතා සීමිත පිරිසක් දන්නා කාරණාවක් විශේෂයෙන් කුඩා දරුවෙක් සම්බන්ධයෙන් කියවුනා.

තව ඉතින් අපේ මිත්‍රයන්ට කියපු අනාවැකි ගැන දැනගන්න තව අවුරුදු 5කින් 6 කින් පුළුවනි. ඒ හැම කෙනාගේම වගේ අතීතය සහ වර්තමානය 90% හරි.මේවගේ හරියට කියවුණු අය අතර මගේම සහෝදරයට නාඩිය වැඩ කරේ නැහැ.

 You Tube  මාධ්‍යයේත් නාඩි  පිලිබඳ සිංහල මෙන්ම විදේශීය ජාතිකයින් නාඩි අහන හැටි බලන්න පුළුවන්. කාලයකට ඉස්සර රන්දික විජේසිංහ කියන You Tube කරුවා රාමුව නාලිකාවෙන් නාඩි පිලිබඳ මධ්‍යස්ථ වැඩසටහනක් කරා.

 නාඩි හරියට කියවුන අයද වැඩි, වැරදුන අයද වැඩි, කියලා ඇහුවොත් සංඛ්‍යාත්මක උත්තරයක් දෙන්න අමාරුයි.

නාඩි  ගැන කතාකරනකොට ඒක අනාවැකි කලාවේ (විද්‍යාවේ) කොතැනක ස්ථාපනය කරන්න පුලුවනිද කියලා පහත සටහනෙන් හොයාගන්න පුළුවන්. මේක යම් ප්‍රමාණයකට දියුණු ශාස්ත්‍රයක්.

ප්‍රධාන වර්ගය	උදාහරණ
🌀 විධිමත් අනාගත අනාවරණ ක්‍රම	- බටහිර ජ්‍යෝතිෂය- ඉන්දියානු ජ්‍යෝතිෂය- නාඩි ජ්‍යෝතිෂය- චීන ජ්‍යෝතිෂය- හස්ත රේඛා- අංක විද්‍යාව	- Western Astrology- Indian Astrology- Nadi Astrology- Chinese Astrology- Palmistry- Numerology
🔮 අධි මානසික / ආත්මික හැඟීම් භාවිතා කිරීම	- මානසික කියවීම්- මාධ්‍ය මඟින් මලවුන්ගෙන් කියවීම- Crystal Ball Gazing	- Psychic Readings- Mediumship- Crystal Ball Reading
🗝️ රහස්‍ය හා ජනප්‍රිය ජන විශ්වාස (Folk & Cultural Mysticism)	- ඔරාව කියවීම- අල්කෙමි- සිහිනය විවරණය- වාස්තු ශාස්ත්‍රය- ෆෙන්ග් ෂුයි	- Aura Reading- Alchemy- Dream Interpretation- Vastu Shastra- Feng Shui
🪷 ආධ්‍යාත්මික වර්ධන (Mystical Growth Tools)	- චක්‍ර ශක්තිය- කුණ්ඩලිනි ඇරඹුම- ආශිර්වාද / ශාප- මන්ත්‍ර / යන්ත්‍ර	- Chakra Energy- Kundalini Awakening- Blessings / Curses- Mantra / Yantra
🔍 විශ්ලේෂණ ක්‍රම (Performative or Questionable)	- අකුරු විශ්ලේෂණය- ඇඟිලි සලකුණු අනුව- දාදු කැට	- Letter Analysis- Fingerprint Predictions- Dice Readings (Daadu Keta)
🕸️ අබිරහස් සම්ප්‍රදාය (Occult Traditions)	- ගුප්ත සංකේත- අඳුරු ශාස්ත්‍ර / බ්ලැක් මෙජික්	- Secret Symbols- Occultism / Black Magic

නාඩි  කියන දෙමළ වචනයේ තේරුම ගලායන ස්වභාවය වගේ එකක් .(“channel,” “stream,” or “flow”) ජෝතිෂ්‍ය අනුව flow of life or destiny වගේ තේරුමක් දෙනවා.නාඩි විශ්වාසයන්ට අනුව ශාස්ත්‍රය පටන් ගන්නේ මහා ඍෂි වරුන් ගෙන්. අගස්තියා Agastya ඍෂි තුමන්ට අමතරව තවත් අය ගැන සඳහන්. ඒවායින් බිහිවුන නාඩි ශාස්ත්‍රය වෙනම දැකගන්න හැකියි.

 

 අගස්තියා මහා ඍෂි

 

 නාඩි විශ්වාසයන්ට අනුව මේ ශාස්ත්‍රය ලියවෙන්නේ අගස්තියා ඇතුළු ඍෂි වරුන් විසින්. වර්තමානයේ දැකගන්න පුළුවන් තල් පත් වල තියෙන්නේ Vatteluttu කියන පුරාණ  දෙමළ භාෂාවට සම්බන්ධ අකුරු වලින්. ඒ නිසා නාඩි කියවනකෙනා මේ අකුරු ඉගනගැනීම වැදගත්. තමිල්නාඩුවේ පාරම්පරික පවුල් කීපයක්  මේ අකුරු ඉගනගෙන තමයි නාඩි කියවන්නේ. මේ ඍෂිවරු ඉඳලා තියන කාලවකවානුව ක්‍රි පුර්ව  1200 තරම් ඈතකට යනවා.

 

Vatteluttu

දැන් මේ ඉතිහාසය පිරික්සා බැලීමේදී ඒක  දෙමළ  ජාතිකත්වය විසින් ටිකක් උත්කෘෂ්ටය  නංවලා කියල තේරෙනවා.(ජාතිවාදය නෙමෙයි,ඕනෙම ජාතියකට ජාතිකත්වයක් තියනවා සිංහලයා තමයි මේක    ජාතිවාදය  කියලා පටලවාගෙන කටයුතු කරන්නේ)

අගස්තියා මහා ඍෂි සම්බන්ධ බවට සැලකෙන වේද පවා ග්‍රන්තාරුඩ වෙන්නේ පසුකාලයක. එහෙම කාලයක අවුරුදු දහස් ගණනකට ඉස්සර vetteluttu නෙමෙයි වෙනයම් ලිඛිත  භාෂාවක්වත් තිබ්බද කියල සැකයි. vetteluttu කියන අකුරු භාවිතා වෙන්නේ දෙමළ  බ්‍රාහ්මීය අක්ෂර වලිනුත් පස්සේ.ඊළඟට අගස්තියා ඍෂි තුමා දෙමළ  ජාතිකයෙක් කියලා කියන්න උත්සහ කරනවා. එතුමා දෙමළ ව්‍යාකරණයේ පියා කියලා කිව්වත් එහෙම පොතක් හොයාගන්න නැහැ  (Agattiyam)

 මේ ලියවිලි වල භාෂාව vatteluttu අනුවත්, තල්පතක ආයු කාලය අනුවත්, වයස ක්‍රි ව ගණනින් කිවහැකි වුවත් ක්‍රි පු වෙන්න බැහැ. මේවා C 14 කාලනිර්නයකට ලක්කළ බවට පදනමක් ඇති සාක්ෂිත් නැහැ.

 මධ්‍යස්තව ගත්තොත් මේ ශාස්ත්‍රය මතුපිටට එන්නේ සිද්ධ ශාස්ත්‍රය ඇසුරු කරගන වගේ කියලයි හිතෙන්නේ. සමහරවිට මේ ශාස්ත්‍රය දැනගෙන හිටිය යෝගින්ගෙන් ඉගනගෙන වඩා පුළුල් පිරිසකට අදාළව  ලිව්වා වෙන්නත් පුළුවනි. කොහොමටත් මුළු ලෝක ජනගහනයටම නාඩි පත්‍ර නැහැ. පුරාණ  ඍෂිවරු පස්සේ කාලයක නාඩි අහන්න එන අය දැනගෙන ඒ පත්‍ර විතරක් ලිව්වා කියලා තමයි කියන්නේ.

 

කාල සටහන

ක්‍රි.පූ. 1500–1200                අගස්ත්‍ය මහා ඍෂි.  උතුරු   ඉන්දියාවෙන් දකුණට ගිය බව විශ්වාස කෙරේ.

ක්‍රි.පූ. 1500–1000               වේද  දේශනා (මුළුමනින්ම වාචික)    සන්ස්කෘත භාෂාවෙන් වාචිකවම පවතින                                             වෙද: රිග්, ඍජු ,

ක්‍රි.පූ. 1000–600                  අවසන් වේද  කාලය / උපනිෂත් කාලය ලිවීමේ පද්ධතියක් තවම නැත;                                                       වාචික උගන්වීම් පවතිණි.

ක්‍රි.පූ. 563–483                     ගෝතම බුදුරජාණන්වහන්සේගේ ජීවිතය.මාගධි ප්‍රාකෘත භාෂාවෙන් දේශනා කළේය.

ක්‍රි.පූ. 300                             වේද  ලිවීම ආරම්භ වේ

ක්‍රි.පූ. 268–232                    අසෝක රාජ්ජුරුවන්ගේ රාජධානිය බෞද්ධ ධර්මය පැතිරීම. බ්‍රාහ්මී හා                                                       ඛරෝෂ්ඨි ලිපි භාවිත වේ.

ක්‍රි.පූ. 250                             අසෝක ලිපි — බ්‍රාහ්මී ලිපි භාවිතය ඉන්දියාවේ සහ ලංකාවේ පළමු ලිවීමේ                                               සාක්ෂිය.

ක්‍රි.පූ. 247                             මහින්ද හිමියන් ශ්‍රී ලංකාවට පැමිණීම  තෙරවාද බුද්ධ ධර්මය රටට ඇතුළු වීම.

ක්‍රි.පූ. 29                               ත්‍රිපිටක ශ්‍රී ලංකාවේ ලියවීම (අලුවිහාරය)   බෞද්ධ ග්‍රන්ථ පළමු වරට ලියවීම.

ක්‍රි.ව. 3–4                             vetteluttu ලිපි ආරම්භවේ දෙමළ-බ්‍රාහ්මී වලින් උරුම ලැබූ පටන්ගත්                                                       ලිපියකි.

ක්‍රි.ව. 5–12                           vetteluttu ලිපි ව්‍යාප්ත භාවිතය දෙමළනාඩු, කේරළය තුළ භාවිත කෙරේ.

ක්‍රි.ව. 10–13                         නාඩි වාක්‍ය පත්‍ර ලිවීම, vetteluttu භාවිතයි.

ක්‍රි.ව. 1858                           බ්‍රිතාන්‍ය රාජ්‍යය — ඉන්දියාවේ පාලනය අරඹයි  පාර්ලිමේන්තු පාලනය.

1947–1948                         ඉන්දියාව සහ ශ්‍රී ලංකාව ස්වාධීන වේ  ඉන්දියාව — 1947, ලංකාව — 1948.

 

මේක දළ වශයෙන් ලබාගත් කාල සටහනක්. මෙහි අව්රුදු ගණන සමහරවිට ටිකක් වෙනස් වෙන්න පුළුවන්. අදහසක් ගන්න තමයි වුවමනාව.

 

Vaitheeswaran Koil

 

     දැන් මේ නාඩි  වාක්‍ය ඇසු  නො ඇසූ අය  කරන සමහර විවේචන වලංගු නැහැ . ඒවා ප්‍රාථමික විවේචන. හොරු ඇති නමුත් මේකේ යම් විමසා බැලිය යුතු ශාස්ත්‍රයක්. ඒවගේ විවේචන කීපයක් පහත තියනවා මට හිතෙන්නේ ඒවායේ පදනමක් නැහැ.

 1.මමත් යාලුවෙකුගේ අවශ්‍යතාවයක් නිසා මිනිහගේ තනියට ගියේ ,ගියාට පස්සේ මොකද්ද කියලා බලාගන්නත් එක්ක මටත් මේක අහන්න වුවමනා වුනා. මගෙනුත් ප්‍රශ්න වගයක් අහගෙන ගියා ඒත් ඉන් එකකටවත් මට දෙන්න වුන උත්තරය තමයි නෑ ,ඊට පස්සේ කිව්වා ඔයාගේ පොත තාම ඇවිත් නෑ ආවම කෝල් එකක් දෙන්නන් කියලා ,ඊට හරියටම සති දෙකකට පස්සේ එහෙම කියපු මනුස්සයගෙන් මට ෆේස්බුක් රික්වෙස්ට් එකක් ඇවිල්ලා තිබුනා, ඉතින් තව මොන කතාද මම ගියේ නෑ

2.මෙතැන වෙන්නේ බොරුව ..මම උන්ව ඇන්දුවා. මගෙන් අහන ප්‍රශ්න වලට එක පාරක් එක පිලිතුරක් දීලා,තව පාරක වෙන පිලිතුරක් දුන්නා. ප්‍රශ්න 200ක් විතර අහලා ඒ ප්‍රශ්න වලින්ම අපේ නම,ගම,තාත්තා අම්මාගේ නම හදාගන්නවා. හැම මේසයක් පිටිපස්සේ එක් කෙනෙක් හොරෙන් අපේ ප්‍රශ්න ගලපලා විස්තරේ හදාගන්නවා. හැංගිලා ඉන්න කෙනාගෙන් විස්තරේ ගන්න ඕන නිසා ආයේ ඇතුල් කාමරයට ගිහින් තව ole leaves set එකක් එක්ක අපි ගැන විස්තර ගලපපු පිටිපස්සේ හැංගිලා උන්නූ කෙනා හදපු කොලේත් හොරෙන් තියාගෙන අපේ නම ගම කියනවා. විශ්වාසය දිනාගත්තට පස්සෙ අනිත් ඒවා අනාගත තොර්තුරු.. ඒවා ඉතින් ඕන කෙනෙකුට කියන්න පුලුවන්නේ අතින් පයින් දාලා.

ඊට අමතරව ඇඟිලි සලකුණ අනුව විස්තර රජයේ වෙබ් අඩවියකින් සොයගන්නවය එහෙම නැත්නම් investigators දාලා  තොරතුරු ගන්නවය වගේ වෙන්න බැරි දේවල් වල තර්ක ගොඩනගන අයත් ඉන්නවා. 

නාඩි හරියන්න යම් සාධක ටිකක් බලපානවා. හරියටම තමන්ගේ නාඩි පත්‍රයම සොයාගැනීම වැදගත්. මේකට නාඩි කියවන්නා හොඳ Vatteluttu  විශේෂඥතාවයක් තියෙන්න ඕනේ. නැතිනම් මුළු තල් පත්‍රයම කියවන්නේ වැරදියට.

 දැනට තියන කරුණු අනුව නාඩි වාක්‍ය විසින් තමන්ගේ අතීතය හොඳින් විස්තර කරනවා.නමුත් අනාගතය තරමක පැටලිලි සහගතව තමයි කියවෙන්නේ.නාඩි කියවන්නා ඉන්දියානු ජෝතිශ්‍ය හොඳින් හදාරලා නම් කේන්ද්‍රය බලාගෙන අනාගතය කියනවා වෙන්නත් පුළුවන්. එත් උපන්දවස විතරක් දැනගෙන වෙලාවක් නොදැන හරිම කේන්ද්‍රය කියන එකම වටිනාකමක් එකතු කරනවා.

 නාඩි  වාක්‍ය හරිනම් එය දාර්ශනික ගැටළුවලටත් මගපාදනවා. ඒවායින් සමහරක්

🧭

Free Will vs Determinism නිදහස් කැමැත්තය සහ අනිවාර්යභාව -	ජීවිතය දැනටමත් ලියලා තියෙනවා නම්, මට නිදහස් කැමැත්තක් තියෙනවද?
Time  loop කාල තරණය	පසුව උපන් මම ගැන ඍෂි වරයෙකු පෙර ලියවීමක් කළේ කෙසේද?
Biometric knowledge  ජෛවමිතිය  පෙර දැනීම	මගේ ඇඟිලි සලකුණු පෙර දැනීමක් සිදු කළේ කෙසේද?ඇඟිලි සලකුණ කියන එක ලෝකය පුරා වර්තමානයේ අනන්‍ය ලක්ෂණයක් ලෙස දකිනවා. නමුත් ඒක  අතීතයේ දීම  සටහන්වෙලා ඉවරයි
Karma vs Scripted Fate කර්මය සහ ලියවුනු දෛවය	කර්මය මගින් ජීවිතය වෙනස් කළ හැකිනම්, ලියවුනු වාක්‍ය සත්‍යද?
Observer Effect Paradox නිරීක්ෂක බලපෑම්	නාඩි කියවීමෙන්  පසුව මගේ මනසට දෛවයට වෙනසක් වෙනවාද ?

 මේවා ඉතින් මොලයට ගැට වැටෙන ප්‍රශ්න. නාඩි වාක්‍ය බොරුවක් කියලා සරලම හිතුවොත් මේ ගැට නැහැ. නාඩි  වාක්‍යවලින් ස්වායක්තවත් free will, observer paradox,  karma, fate  ගැන විද්‍යාත්මක ලෝකයේත් කතාවෙනවා. මේවා ගැන හිතනවා නම්  මොළයට  ව්‍යායාමයක් වශයෙන් විශේෂයෙන් dementia  වළක්වාගන්න හොඳයි.

 පසුගිය ලිපියට අජිත් මහත්මයා ලියලා තිබුනා quantum ලෝක සම්බන්ද අදහසකින් මේවා පැහැදිලිකිරීමක් කරන්න ගන්න උත්සහයක්. ඒක එක උපකල්පනයක් වශයෙන් වැදගත්

 නාඩි වාක්‍ය ගැන තවදුරටත් පරීක්ෂණ වෙනවානම් හොඳයි. ඒක කරන්න පුළුවන් ඉන්දියානු විශ්වවිද්‍යාල, පරීක්ෂණ නොකරන්නේ ඇයිද කියන එක ගැටළුවක්. ආගමික මතවාද වලට බයේ කියල තමයි මට නම් හිතෙන්නේ.

මේක දෙපැත්ත කැපෙන ආයුධයක් වගෙ නිසා නිකරුණේ  වියදම් කරන්න හොඳ නැහැ. පරිස්සමින් භාවිතා කරන්න ඕනේ. නක්කත්ත ජාතකයේ “අත්තෝ අත්තස්ස නක්ඛත්තං – කින් කරිස්සන්ති තාරකා? (“කාරණය ඉෂ්ට වේ නම් එයම නැකතය. නැකත් තරුවලට කුමක් කළ හැකිද?) කියලා දේශනාවක් තියනවනේ.

  හැබැයි මගේ නිහඬ අදහස වෙන්නේ පෙරදිග විද්‍යාවන් ගැන තව හොඳ අධ්‍යනයකින් තොරව මිසක් සම්පූර්ණ බැහැර කිරීමක් නොකළ යුතු බවයි .

අනාවැකිය 1

 

කාලෙන් කාලෙට අනාවැකි කරුවෝ බිහිවෙනවා. ලෝක මට්ටමේ බබා වැන්ග සහ නොස්ට්‍රඩමුස්    ( Baba Vanga and Nostradamus) කියලා දෙන්නෙක් හැම අවුරුද්දක්ම ජනවාරි මාසයේ හොල්මන් කරනවා. ලෝකේ කොහේ හරි යුද්දයක් එහෙම නැතිනම් ස්වාභාවික විපතක් උනොත් ඔන්න ඔය දෙන්න ඕක වේලාසනම කියලා  තිබ්බ කියලා නටනවා. ලංකාවෙත් අඩුවැඩි වශයෙන් ඔහොම අනාවැකි කාරයෝ ඉන්නවා. සිංහල බෞද්ධ සමාජය විතරක් නෙමෙයි ජෙරමි කියලා කියන පාදිලි උන්නාන්සේත් ඕවට ප්‍රසිද්ධයි.අනාවැකි කාරයෝ සාස්තර කාරයෝ ඉන්නේ ආසියාතික පසුගාමී සමාජවල විතරක් නෙමෙයි.

 

මිනිසාට පාලනය කරගන්න බැරි අනාගතයක් නිසා ඊළඟ ට වෙන්න තියනදේ ගැන හොයාගන යනවා. විද්‍යාත්මකවත් කාලගුණේ ඉදලා මැතවරණ ප්‍රථිපල ගැනත් අනාවැකි කියනවා. එව්වත් මොන ගණිත මිණිත සුත්‍ර දැම්මත් වරදිනවා.ඊට අමතරව science fiction  කියන්නෙත් එක්තරා ආකාරයක අනාවැකි.  Arthur C Clarke කියන්නේ අනාගත ආශ්චර්යයන් ගැන හීන දැකපු කෙනෙක්.එහෙම වැරදුනහම අපි හිනාවෙන්නේ නැහැ.සමච්චල් කරන්නේ නැහැ.

 

විද්‍යාත්මක වගේම අනෙකුත් කේෂ්ත්‍ර වලත් හොරු බොරු කාරයෝ අනාවැකි කියනවා.ආසියාතික විද්‍යාවන් ඔප්පු කරගන්න අමාරු නිසාත් ඒවායේ තියන ඉන්ද්‍රජාලික ස්වභාවය නිසාත් හොරු බොරු කාරයෝ වැහිවැහිලා.

 

මේ කියන පෙරදිග අනාවැකි බහුලවම පුද්ගල කේන්ද්‍රීය ඒවා.

 

මම අවුරුදු දහතුනක් විතර කාලයේදී තමයි කොවුර් ගේ දෙවියෝ සහ භූතයෝ කියන පොත කියෙව්වේ. ඒවුනත් තරුණ වයස වෙද්දීම දැඩි භෞතිකවාදී දැක්ම මට නැතිවුණා.  කේන්දර වගේ දේවල් පස්සේ යන එක නම් අඩුයි.

 

දැන් අවුරුද්දක වගේ ඉඳලා අපේ බිරින්දෑ එකපාරටම අනාවැකි කාරයෝ ටිකක් පස්සේ යන්න ගත්තා. මමත් එයා පිටිපස්සේ ටිකක් ඉන්නවා මොකද ඔය නෝනා ඔයවගේ ඒවාට ගියහම තමන්ගේ මොලයේ තියන STOP, PAUSE, ENOUGH කියන බොත්තම් ටික අමතක කරනවා. මම ඉන්නේ ඕවා මතක්කරලා දෙන්න. මගේ නව යොවුන් දියණියත් මේකට සෙට් වුණා. ඒගොල්ලෝ මතුපිටින් කිව්වේ ඇත්ත නැත්ත බලන්න යනවා කියලා. ඇත්තටමත්  එහෙම වෙන්න ඇති. මොකද අනාගතය ගැන මහා භයානක තත්වයක් නැහැ. ඔය හැමෝටම තියන අවිනිශ්චිතතාවය නම් තියනවා.

 

ඔන්න ඔහොම තමයි අපිත්, ළඟම  හිත මිත්‍ර පිරිසකුත්, නාඩි වාක්‍යම් බලන්න යොමුවුණේ. අපි හැමෝම COLD  READING කියන එක ගැන හොදින් දන්නවා. ඒක  නිසා සුදානමින් තමයි ගියේ.

                  

සතියේ දවසක කොළඹ ඉන්නකොට උදෙන්ම ඇහැරිලා 7.30 විතර වෙනකොට බම්බලපිටියේ හරස්පාරක තියන නාඩි කියන ස්ථානය හොයාගෙන අපි ගියා. කිසිම පේවිමක් සුදානමක් නැහැ. කේන්දර වල ඩිජිටල් කොපියක් තිබුනා. එකපාරටම හදුනාගන්න අපහසු පරණ ගොඩනැගිල්ලක කුඩා දොරකින් ඇතුළු වෙලා පඩි පේලියක් නැගල පටු කොරිඩෝවකට ඇතුල්වුණා. අම්මෝ එතකොටත් සෑහෙන  පිරිසක් එතන. සිංහල වගේම දෙමළ  පෙනුම තියන අයත් හිටියා. දිගට ප්ලාස්ටික් පුටු දාලා තිබුනා. ඒ පුටුවක කෙනෙක් වාඩි  උනහම යන්තම් තව කෙනෙකුට ඉස්සරහින් යන්න පුළුවන්. මම හිතන්නේ 100ක් විතර ඉන්න ඇති.

 

මුලින් කිව්වා වගේම cold reading වලට අහුවෙයි කියලා හිතපු නිසා අපි එතන හිටපු කිසිම කෙනෙක් එක්ක කතා කරේ නැහැ. ඒ තියා අපි තුන්දෙනා වත් එකිනෙකාට කතාකරේ නැහැ. මෙතැනදී විශේෂම දේ තමයි අපි සමාජ මාධ්‍ය  වන face book ඉන්ස්ටග්රම් X  වගේ ඒවා පාවිච්චි කරන්නේ නැතිවීම. ඔය මගුල් අපි අයින්  කරලා දැම්මේ දැන් අවුරුදු 10කට විතර ඉස්සර. අලුතින් අපේ දුවවත් එවැනි account පාවිච්චියක් නැහැ.

උදේ 8 විතර වෙනකොට පෝලිම හෙමින් එකා දෙන්නා කොරිඩෝවේ කෙලවර පොඩි තට්ටු නිවාසයක සාලයක් වගේ කෑල්ලකට  ඇතුළුවුනා . හින්දු දේව රූප  තිබුනත් කෝවිලක ස්වභාවයක් තිබුනේ නැහැ. පාවහන් නම් ගලවලා තමයි ඇතුල්වුනේ.ඒක  ඉතින් අපි ගෙදරකට ගියත් කරනවනේ.එතන මේසයක් ළඟ කොළ  කෑලි තිබ්බා අපට වුනේ ඒ කොළ මත ඇගිළි  සලකුණු තියන්නේ . පිරිමි කෙනෙක් නම් දකුණු අතෙත් ගැහැණු නම් වම අතෙත් මහපට ඇඟිලි සලකුණු කරන්න  කියලා උපදෙස් දුන්නා. ඒ එක්කම උපන්දිනය දින මාස වර්ෂ වශයෙන් සටහන් කරගත්තා. මතක හැටියට කොළ දෙකක.

 

ඕකෙන් පස්සේ අයෙත් වාඩිවෙලා  පැය  භාගයකට විතර පස්සේ දෙමළ  හෝ මලයාලම් කියලා කියන්ඩ පුළුවන් මහත්තයෙක් උපන් දින කතා කරා . එහෙම තමන්ගේ උපන්දිනය කථා කරහම අර කොලයක් අපිට ආපහු දෙනවා. එකේ එන්න ඕනේ වෙලාව සටහන් කරලා. අපේ නෝනට 10.30 ට උන්දැට බෝම සතුටුයි. මගේ නාඩි නැහැ. කොළයේ  මාස තුනකට විතර පස්සේ දිනයක් සටහන් කරලා. කිව්ව විදිහට මගේ පත් ඉරුව ඉන්දියාවේ ප්‍රධාන කෝවිලේ තමයි තියෙන්නේ. ගේන්න මාස තුනක් යනවා. හ්ම්ම් සාධාරනයි. අපේ දියණිය මෙතැන දැවටෙන්නේ භෞතිකවාදිනියක් විදිහට. එයා අම්ම අප්පච්චිගේ සුළු හෝ අතපසුවීමක් වෙන්න පුලුවන්ද කියලා නිරීක්ෂණය කරනවා.

 

ඔහොම කරලා අපි උදේට කන්න ගියා. ළඟ පාත කන්න තැනක් තිබුනේ නැහැ. ටිකක් ඈතක majestic  city හරියෙන් තෝස  කාලා 10.30 වෙනකොට ආවත් තවත් පැයක්  විතර ගියා අපිව ගන්න. එතකන් මතකනේ නෝ කතා නෝ සිනා.

 

අනාවැකි කියන්න ඇතුළු වුනේ ඉතා කුඩා ටිකක් අඳුරු වායු සමීකරණය කරපු කාමරයකට. ඉන්දියානුවෙක් එතන වාඩිවෙලා  හිටියා.  සුදු ඇඳගෙන හිටියත් පුසාරී කෙනෙක්ගේ පෙනුම තිබ්බේ  නැහැ.ඊට  අමතරව translator එතන හිටගෙන ඔහු කලිසම් කමිස ඇඳගෙන.

 

අපි වාඩිවුණා. නාඩි කියවන්නා අපි දිහා එතරම් උවමනාවකින් බලුවෙනැහැ. ඔහු යොමුවෙලා හිටියේ ඔහු ඉදිරියේ තිබුන පුස්කොල පොත් කිහිපයකට.දැනටමත් ඔවුන් නාඩි  අහන්නේ ගැහැනියද  පිරිමියාද ඔහු හෝ ඇයගේ උපන්දිනය මොකක්ද කියන එක  දන්නවා. ඊට පස්සේ තමාගේ නම මවගේ නම හා පියාගේ නම කියන අවස්ථාව . මේක පොඩි filter එකක් වගේ හරි නම් හරි කියන්න කියලා කියාගෙන යනවා ( භාෂාව දෙමළ ? ) අතරමැද අපේ මුහුණු බලන ස්වභාවයක් නැහැ. අපේ නෝනා නිතරම භාවිතා කරන නම කියවුනහම අම්මත් තාත්තගෙත් නම් කියන්න පටන්ගත්තා. එහෙම නම් තුනක්ම හරි යන්න මේ trial  and  error  අවස්ථා 10 ක් විතර ගියා. (Name Dropping?) අපේ නෝනා කිව්වේ හරි නම් හරි කියලා විතරයි. අපේ භෞතිකවාදී දුවත් සාක්කියට හිටියා. ඔහොම 10වෙනි පත් ඉරුව හරියටම කිව්වම filter  කරන episode  එක ඉවරයි. ඉන් පස්සේ අර දෙන්න අර තෝරගත්ත පත් ඉරුවත් අරගෙන කාමරයෙන් එළියට  ගිහින් තවත් පුස්කොල පොතකුත් අරගෙන ආපි.මතක තියාගන්න අපි තවම නො කතා නො සිනා. මෙතනට එනකන් ඒ අය  මේක පටිගත කරන්නේ නැහැ. අපිට පටිගතකරගන්න බාධාවක්  නැහැ.

 

ඉන් පස්සේ තමයි හරි අනාවැකි පටන්ගන්නේ ඒ ටික පටිගත කරලා අපිට දෙනවා. පරණ බලපු අය  කිව්වේ CD  එකක් කියලා. වර්තමානයේ නම් pendrive එකකටත් එහෙම නැත්නම් whatsapp මාර්ගයෙනුත් ගෙන්න පුළුවන්. (තවම අපි දුරකථන අංකයක් දුන්නේ නැහැ ඒක  අවසානයට කරන දෙයක් )

 

නාඩි  වල පරිච්චේද තියනවා එයින් පළමුවන පරිච්චේදය හැමෝටම කියනවා. ඉතුරු ඒවායින් කීපයක් අපි තෝරා ගන්න ඕනේ. 

                 

මෙතන ඉදන් අපි කිසිදෙයක්  කතා කරන්න ඕනේ  නැහැ. ඔවුන් කියාගෙන යනවා. කේන්දරය කොටු රාශි ලග්න ටික ඔවුන් කියාගෙන යනවා. අපි ළඟ තියන    වනම් කේන්දරය හරිද කියලා cross  check  කරගන්න පුළුවන්.

 

පලවෙනි පරිච්චේදයේදී අපේ නෝනට හරි ගියපු ඒවා කිව්වොත්

තමන්ගේ නම, මව පියාගේ නම්, ස්වාමියාගේ නම, සහෝදරියන් හෝ සහෝදරයින් කීදෙනෙක් සිටිනවාද යන්න ,දරුවන් ගණන, ජීවත්වන්නේ ලංකාවෙන් පිටත බව, උගත් බව, උපාධියක්ද ඩිප්ලෝමාවක්ද යන්න ,   දැනට රැකියාව කරන බව හෝ නොකරන බව, දරුවන්ගේ අධ්‍යාපනය ,කොටින්ම කිව්වොත් රැකියාව පාර්ට් ටයිම් කියලත් කියපි. ඇගේ  අධ්‍යාපන හා වෘත්තීය සුදුසුකම් වගේම මගේ අධ්‍යාපනය සුදුසුකම් හා රැකියාවත් කිරිගහට කිව්වා කියලා කියන්න පුළුවන්. කේන්දරයත් හරියටම රාශි කොටු පිහිටවලා කිව්වා.

 අපේ බිරින්දෑ  තෝරාගත් තවත් පරිච්චේදයක් තමයි පෙර ආත්මය එකනම් අපිව හිනා ගැස්සුවා. උන්දැගේ  පෙරාත්මය  ගෙවිලා තියෙන්න ලංකාවේ පුත්තලම පැත්තේ කියලා තමයි කියවුනේ. එයා හිතාගෙන හිටියේ එයා ඉන්දියාවේ රූමත් කුළ  කාන්තාවක් කියල කියයි කියලා.

ඔන්න ඔය විදිහට නාඩි  වාක්‍යම් අපිව ටිකක්  විතර පුදුමයට පත්කරා. ඒක  හින්දම අපේ භෞතිකවාදී දුවත් මේක අහන්ඩ කැමැත්තක් ආවා.

 

අපේ පවුලේත් හිත්මිතුරන්ගේත් නාඩි පිලිබඳ අත්දැකීම් තවත් 15 පමණ තියනවා. ( මගේ නාඩියත් මේ මෑතකදී ඇහුව)

ඔය අත්දැකීමුත් , මේ ගැන නිහඬවම හොයලා බලපු දේවලුත් ටිකක් විමර්ශනාත්මකව තව ලිපියකින් කථා කරමු. එතකන් නාඩි හොයාගෙන යන්න කලබලවෙන්න එපා.දැනටමත් නාඩි අහලා තියනවනම් අදහස් බෙදා ගන්නවා නම් සතුටුයි.